February 18, 2009

''....U Yi goi yang nhtoi n htoi ai....Kawa htummun kadai ndaw,mungpang wadai nhpaw '' nga ai ga malai ni gaw salang hpawng hta amyu shayi ni tsun bawng ai ga hpe num ma ga ngu nna n hkap la ai. Amyu shayi ni hpe lata layung n daw ai lam ni rai nga ai. Ndai zawn shadang la ni e layung n daw ai gaw shayi num sha ni daram myit sat sa ai lam n nga ai La n kau mi myit la ai hte, anhte amyu shayi sha ni nan mung,anhte a atsam hpe n madun lu ai majaw rai nga ai. Raitim mung dai ni na prat hta num la n ginhka ai, lam shagu hta ahkaw ahkang maren sha galaw sa wa sai. La ni chyu sha galaw lu ai ngu myit da ai Mung Uphkang lam hta daini shayi num sha ni shang bang wa sai. India Mung Mrs, Indra Gandi uphkang nga ai htan n-ga, Cylon.America,Englang,Philippine Mung ni a Paliman (parliament) hta shayi num sha ni shanglawm let Mungdan Mung masa lam ni hta maren, rapra ai hku lu shakut nga ma ai.Mungdan uphkang lam hta sha nrai, Hpungtang hpaji lam ni hta mung la ni hte mare chye chyang ai hte tamsawk lu sai, Madame Cury gaw Atomic n-gun a npawt nhpang hpe mu tam ai jan re. Ntsa malen pyen ai nbungli ni hpe La ni hte maren shayi num sha ni gau sai hta n-ga , Russia amyu shayi sha Valentina Threshskova gaw maten li jawn nna mungkan hpe shing-grup sai. Israel amyu shayi sha ni gaw La ni hte maren mungdan makawp maga lam hta lit la nga ma ai. Dingdung Vietnam na myu shayi ni mung Motar dap hta shang nna mungdan hpe makawp nga ai hta n-ga majan pa hta shat lu sha, tsi mawan,matu mahkai lam ni hpe mung lit la nga ma ai.
'' Wan dap hta hpung Jum dinghku hta anum '' nga ai hte maren shayi num sha ni gaw dinghku hta ahkyak dik ai ni rai nga ga ai. Dinghku gaw mungdan a ningpawt ninghpang ra nga ai. Ndai lam ni hpe yu yang anhte shayi num sha ni a atsam gaw gade daram ahkyak ai hpe mu lu nga ai.
Wunpawng shayi num sha ni mung,daini anhte a atsam hpe madun dan let, mungdan galu kaba maden zinghka sa wa na matu La ni hte shaning jawng nna, galaw sa wa na matu ahkaw ahkang lu ai hte galaw mung galaw nga saga ai. Raitim, anhte gaw shinggyim gawng kya ai ni re ngu myit la nna anhte a atsam marai ni hpe dinghku kata shat gawk na wan
mang hta ju kau ai ni naw law nga ai. Shat gawk nna pru nhtawm madang hpring ai hku anhte a atsam hpe madun ai hte lam shagu hta sung sung myit sawn dinglik yu nna, La ni hte shing jawng sa wa yang she,madang hpring ai ahkaw ahkang lu na hte '' U yi goi yang nhtoi n htoi ai '' nga ga mung mat sana rai nga mali ai majaw, anhte a manu dan la ai atsam
marai hpe shapraw let, myu hte mungdan a matu galaw gunhpai shakut shaja sa wa ra saga law.

By : Dakkasu Htoi Ra