January 7, 2009

1948 ning, January shata hta mungdan Gumsan Magam Sao Shwe Thaik Jinghpaw Mungdaw de du sa ai shaloi hkungga hkamla nga yang

Jinghpaw Mungdaw Nhtoi hpe shaning shagu January 10 ya shani galaw sa wa ai gaw daining rai yang 61 ning hpring sai. Jinghpaw Mungdaw Masat Nhtoi hpe galaw wa ai lam hpe, 1958 ning hta shapraw ai Jinghpaw Mungdaw Ladu Hkrum Laika hta ndai zawn ka da ai:
“Jinghpaw Mungdaw byin wa ai nhtoi
Jinghpaw Mungdaw a awng padang nhtoi kaba ngu na gaw, 1948 ning January shata 10 ya shani rai nga ai.
1948 ning, January shata 10 shani Jinghpaw Mungdaw masat dingsat nhtoi kaba ngu nna galaw sa wa ai lam gaw, dai shani Jinghpaw Mungdaw Council kaba hpe shawng ningnan hpawng ai re.
Dai shawng na hpawng ai council zuphpawng kaw nna Jinghpaw Mungdaw Asuya hpe mung hpaw dat sai.
Jinghpaw mungdaw a ngwipyaw galu kaba wa na. shing n rai, grit yawm wa na lam hpe gaw sharawt dat na council hte Mungdaw Asuya shawng nnan byih wa ai shani hpe Jinghpaw Mungdaw Shani ngu masat tawn da sai.
Shaning shanang Januaary 10 ya shani du shagu asuya rung hte jawng ni hpe pat tawn shangun ai hte Jinghpaw Mungdaw masat nhtoi hpe galaw sa wa ai rai"

1959 ning hta shapraw ai Jinghpaw Mungdaw Ladu Hkrum Laika makawp hte Jinghpaw Mungdaw Nhtoi a lam hpe ka shaleng da ai laika man

Jinghpaw Mungdaw Masat Nhtoi hpe 1988 ning du hkra mungdaw asuya, Mungdaw Kongsi ni kaw nna woiawn galaw sa wa ai. 1993 ning kaw nna, amyu sha myitsu salang ni woiawn nna bai galaw hpang wa sai.

Manmaw Mare kaw galaw ai 9 lang na Jinghpaw Mungdaw Nhtoi

Dai aten kaw nna, Jinghpaw Mungdaw Masat nhtoi hpe Wunpawng Htunghking Hpung ni woi zinlum ai hte Myitkyina Majoi Manau Wang kaw galaw sa wa nga sai. Ndai zawn mungdaw masat nhtoi hpe galaw sa wa ai hta, manau dum ai lamang hpe hpunau amyu bawsang ni hpe mung saw shaga let wu wu di di galaw nga ai.